“ ངེ་གི་ དམིགས་ཡུལ་དང་རེ་འདོད་འདི་ ང་རའི་རྒྱལ་ཁབ་ནང་ལུ་བཅོལ་ཏེ་ཡོད།”
-མི་དབང་འཇིགས་མེད་གེ་སར་རྣམ་རྒྱལ་དབང་ཕྱུག།

མི་དབང་འཇིགས་མེད་གེ་སར་རྣམ་རྒྱལ་དབང་ཕྱུག་མཆོག་ འབྲུག་རྒྱལ་བཞི་པ་ འཇིགས་མེད་སེངྒེ་དབང་ཕྱུག་མཆོག་དང་ལྷན་བཞུགས།

་དབང་འཇིགས་མེད་གེ་སར་རྣམ་རྒྱལ་དབང་ཕྱུག་མཆོག་ ལྕགས་ཕོ་སྤྲེལ་ལོའམ་ སྤྱི་ལོ་ ༡༩༨༠ སྤྱི་ཟླ་ ༢ པའི་ཚེས་ ༢༡ ལུ་ འབྲུག་རྒྱལ་བཞི་པ་ འཇིགས་མེད་སེངྒེ་དབང་ཕྱུག་མཆོག་དང་མི་དབང་རྒྱལ་བཙུན་ ཨ་ཞེ་ ཚེ་རིང་དབྱངས་སྒྲོན་མཆོག་གི་ སྲས་རྒས་ཤོས་ལུ་སྐུ་འཁྲུངས་ནུག།

སྐུ་ན་ཆུང་ཀུའི་བསྒང་ལས་ འབྲུག་པའི་ན་གཞོན་ཚུ་དང་གཅིག་ཁར་ ཤེས་ཡོན་སྦྱང་བརྩོན་དང་ རང་ལུགས་འཆམ་ དེ་ལས་ སྒྲིག་ལམ་རྣམ་གཞག་དང་ ཀུན་སྤྱོད་རྣམ་གཞག་ཚུ་མཐར་ཕྱིན་པའི་ཤུལ་ལུ་ ཡུ་ཨེསི་ ཕི་ལིཔསི་གཙུག་ལག་སློབ་སྡེ་ནང་ གནས་སོར་བྱོན་ནུག། དེ་གི་ཤུལ་ལས་ མ་ས་ཅུ་སེཊིསི་ལུ་ཡོད་པའི་ཀུ་ཤིང་དང་ཝི་ཀྲཱོན་གཙུག་ལག་སློབ་སྡེ་དང་ མཇུག་ར་ ཨོགསི་ཕོརཌ་གཙུག་ལག་སློབ་སྡེ་ མེག་ཌ་ལེན་མཐོ་རིམ་སློབ་གྲྭ་ནང་ལས་ མཐོ་རིམ་ཤེས་ཡོན་མཐར་ཕྱིན་མཛད་ནུག།

སྤྱི་ལོ་ ༢༠༠༢ ཟླཝ་ ༦ པའི་ཚེས་ ༢༥ ལུ་ བསམ་གཏན་གླིང་ མི་དབང་རྒྱལ་པོའི་གཟིམ་ཅུང་ནང་སྦེ་ རྟེན་འབྲེལ་མདོར་བསྡུས་ཅིག་གི་ཐོག་ལུ་ ཡབ་འབྲུག་རྒྱལ་བཞི་པ་ འཇིགས་མེད་སེངྒེ་དབང་ཕྱུག་མཆོག་གིས་ མི་དབང་འབྲུག་རྒྱལ་ལྔ་པ་མཆོག་ལུ་ འབུ་རས་དམར་པོའི་བདག་རྐྱེན་གནང་ནུག།
དེ་བསྒང་ མི་དབང་མཆོག་གིས་ མི་དབང་ཡབ་ཀྱི་མཛད་ཤུལ་འཛིན་ནི་ལས་ལྷག་པའི་གུས་བཀུར་གཞན་མེད་ཟེར་གསུངས་ཡོདཔ་དང་ ཡབ་རྒྱལ་པོའི་མཛད་བྱ་བཟང་པོ་ལུ་ ཡིད་ཆེས་བསྟོད་བསྔགས་ཕུལཝ་དང་བཅས་ མི་དབང་མཆོག་ ཁོ་རའི་དམིགས་ཡུལ་དང་རེ་འདུན་འདི་ ཁོ་རའི་རྒྱལ་ཁབ་ནང་ལུ་ བཅོལ་ཏེ་ཡོད་ལུགས་ཡང་གསུངས་ནུག།

དེ་ལས་བཟུང་སྟེ་ མི་དབང་མཆོག་གིས་ དགུང་ལོ་ཆུང་ཀུའི་བསྒང་ལས་ར་ འབྲུག་ན་གཞོན་ཚོགས་པའི་གཙོ་འཛིན་གྱི་ཕྱག་འགན་མཛད་དེ་ འབྲུག་གི་ན་གཞོན་ཚུ་གི་སེམས་བསྐུལ་མཛད་དེ་བཞུགས་ནུག།

མི་དབང་འཇིགས་མེད་གེ་སར་རྣམ་རྒྱལ་དབང་ཕྱུག་མཆོག་ སྐུ་ན་ཕྲ་བའི་དུས་སྐབས་ལུ།

མི་དབང་མཆོག་གིས་ ན་གཞོན་ཚོགས་པ་དང་སློབ་ཕྲུག་ཚུ་དང་ལྷན་གཅིག་ གསུང་གྲོས་གནང་དུས་ལུ་ རང་ལུགས་འབྲུག་པའི་སྲོལ་བཟང་ ཉམས་མ་བཅུག་པར་ ཆོས་ཀྱི་དབུ་ཁྲིད་དང་གཞུང་ དེ་ལས་ སློབ་དཔོན་དང་རང་རའི་ཕམ་ལུ་ ཐ་དམ་ཚིག་བསྟེན་ཏེ་སྡོད་དགོཔ་གལ་ཆེ་བའི་སྐོར་ལས་ གསུང་ནི་ཡོདཔ་མ་ཚད་ མ་འོངས་པའི་ནང་ རྒྱལ་ཁབ་འདི་ སྒྲིང་སྒྲིང་སྦེ་བདག་འཛིན་འཐབ་ནི་འདི་ ན་གཞོན་ཚུ་གི་ལག་པ་ཨིན་ཟེར་གསུངས་ཏེ་ཡོད།

ན་ཆུང་བྱ་ངན་གྱི་དཀའ་ངལ་འདི་ འབྲུག་ལུ་སྦོམ་སྦེ་མ་འབྱུང་སྟེ་འབད་རུང་ མི་དབང་རྒྱལ་སྲས་མཆོག་གིས་ ཐུགས་ཀྱི་ཚ་གྱང་བཞེས་ཏེ་བཞུགས་ནུག། དེ་ཡང་ ཤེས་ཡོན་འཕྲོ་མཐུད་སྦྱང་མ་ཚུགས་པའི་ན་གཞོན་དང་ ཁྲོམ་གྱི་གནས་སྟངས་ལུ་སྤྲོ་བ་བསྐྱེད་དེ་ རང་ཡུལ་སྤང་སྟེ་ཁྲོམ་ཁར་འོང་མི་ན་གཞོེན་ཚུ་གི་ཁ་གྱང་འདི་ མང་སུ་མང་སུ་འགྱོཝ་ད་ ད་རེས་ནངས་པ་ ན་གཞོེན་དང་འབྲེལ་བའི་དཀའ་ངལ་ཚུ་ བྱུང་དང་འབྱུང་བཞིན་ཡོདཔ་ཨིན། གནད་དོན་དེ་ལུ་བརྟེན་ཏེ་ སྤྱི་ལོ་ ༡༩༩༩ ཟླཝ་ ༦ པའི་ནང་ མི་དབང་རྒྱལ་སྲས་མཆོག་གིས་ ཆུ་ཁ་རྫོང་ཁག་ རྩི་མ་གཤམ་ལུ་ ན་གཞོན་ལམ་བཟང་ལྟེ་བ་ འགོ་ཐོག་དང་པ་གཞི་བཙུགས་གནང་ཡོདཔ་ཨིན།

མི་དབང་རྒྱལ་སྲས་མཚོག་གིས་ ཕྱི་རྒྱལ་གཞུང་དོན་གཟིགས་བསྐོར་དང་པ་འདི་ རྒྱ་གར་གཞུང་གིས་ མགྲོན་བརྡ་འབདཝ་བཞིན་ སྤྱི་ལོ་ ༢༠༠༡ ལུ་ བདུན་ཕྲག་གཉིས་ཀྱི་རིངས་ རྒྱ་གར་བྱོན་ཏེ་ རྒྱ་འབྲུག་གཉིས་ཀྱི་མཐུན་འབྲེལ་སྔར་ལས་དམ་ཟབ་བཟོ་ནི་ལུ་དམིགས་ཏེ་ སྲིད་འཛིན་ ཤྲཱི་ ཀེ་ཨར་ ན་ར་ཡ་ནཱན་དང་ སྲིད་དོན་ཚོགས་པའི་སྲིད་འཛིན་ ཤྲཱི་མ་ཏི་ སོ་ནི་ཡ་ གཱན་དྷི་དང་མཇལ་ཕྲད་གནང་ཡོདཔ་ཨིན།

འཛམ་གླིང་སྤྱི་ཚོགས་ཀྱི་ལྷན་འཛོམས་ནང་ རྒྱལ་སྲས་མཆོག་གིས་ དབུལ་ཕོངས་དང་བཀྲེས་སྐོམ་གྱི་དཀའ་ངལ་ དེ་ལས་ ནད་གཞི་སོགས་རྩ་མེད་གཏང་དགོ་པའི་སྐཽར་ལས་གསུང་བཤད་གནང་ཡོདཔ་ཨིན།

དོ་རུང་ རྒྱལ་སྲས་མཆོག་གིས་ འཛམ་གླིང་འགོ་ཁྲིདཔ་དང་རྒྱལ་སྤྱི་འཐུས་ཚབ་ཚུ་ལུ་ མ་འོངས་རྒྱལ་ཁབ་སྒྲིང་སྒྲིང་བཟོ་ནི་ལུ་ དེ་བཟུམ་གྱི་དཀའ་ངལ་ཚུ་ ད་གཞོན་ཚུ་ལུ་འབྱུང་མ་བཅུག་པར་བཞག་ནི་འདི་ ང་བཅས་ཚུ་གི་འགན་ཁུར་ཨིན་ཟེར་གསུངས་ཡོདཔ་ཨིན། དམིགས་དོན་འདི་བསྒྲུབ་ཐབས་ལུ་ རྒྱལ་ཁབ་དང་མི་སེར་གྱིས་ ལགཔ་གཅིག་ཁར་མཐུད་དེ་ ལོ་གཅིག་དང་གཉིས་ཀྱི་དོན་ལུ་རྐྱངམ་ཅིག་མེན་པར་ ཕ་ལས་བུ་བརྒྱུད་ཚུན་གྱི་མ་འོངས་འཆར་གཞི་སོགས་ལེགས་ཤོམ་བརྩམ་ཏེ་ ལཱ་འབད་དགོཔ་འདི་གལ་ཆེ་ཟེར་ཡང་གསུངས་ཡོདཔ་ཨིན།

སྤྱི་ལོ་ ༢༠༠༣ ལུ་ མི་དབང་རྒྱལ་སྲས་མཆོག་གིས་ འབྲུག་དང་རྒྱ་གར་རྒྱལ་ཁབ་གཉིས་ཀྱི་བར་ན་ མཛའ་བཤེས་མཐུན་འབྲེལ་ སྔར་ལས་ལྷག་སྟེ་ གོང་འཕེལ་གཏང་ཐབས་ལུ་ མཛའ་འབྲེལ་ཆིངས་ཡིག་གུ་ཕྱག་རྟགས་གནང་ཡོདཔ་ཨིན།

མི་དབང་རྒྱལ་སྲས་མཆོག་ལས་ ཕན་འདེབས་ཐོབ་མི་ལས་སྡེ་དང་གཙུག་སྡེ་ཚུ་ འབྲུག་གི་བློ་གཏན་མ་དངུལ་ འབྲུག་རྒྱལ་འཛིན་གཙུག་ལག་སློབ་སྡེ་དང་ རྒྱལ་གཞུང་རང་བཞིན་སྲུང་སྐྱོབ་ཚོགས་སྡེ་ དེ་ལས་ ཡུ་རོ་པེན་འབྲུག་མི་སྡེ་ཚོགས་པའི་ལྷན་འཛོམས་དང་ དཔལ་འབྲུག་ཞིབ་འཇུག་ལྟེ་བ་ཚུ་ཨིན་མས།